0

  • Ruth Juan (Junita Makina) artista arduratu da aste hauetan artelana egiteaz.
  • Esku-hartze horrek modu sinbolikoan erakutsiko du emakume biktimek bizi duten prozesua, indarkeriarik sotilenetik basatienera.
  • Genero-indarkeriaren biktima izan diren eta bizirik atera diren emakumeei eta haien seme-alaba adingabeei errekonozimendua eta erreparazioa emateko udal-estrategiaren barruan dago.

Bilboko Udalak Ruth Juan (Junita Makina) artistari eskatu dio genero-indarkeriatik bizirik atera diren emakumeei zuzendutako memoria- eta erreparazio-mural bat diseinatzeko.

Aste honetan, artista lanean hasi da Bilbo Zaharra auzoko Mesedeetako kaian, erdigunean eta ikusgarritasun handiarekin kokatuko den obraren lehen zirriborroen gainean.

Ekimen artistiko hau genero-indarkeriaren biktima izan diren eta bizirik atera diren emakumeei eta haien seme-alaba adingabeei errekonozimendu eta erreparazio sinbolikoa emateko udal-estrategiaren barruan kokatzen da, “eskubidea berrezartzeaz, aintzatespen sozialaz eta memoria kolektiboa eraikitzeaz ari gara, indarkeria matxistetatik bizirik atera diren biktimen errekonozimenduan sakontzen jarraitzeko“, azaldu du Nekane Alonso Berdintasuneko zinegotziak.

Gainera, azpimarratu duenez, “prozesuak diseinatu behar ditugu emakumeak esku-hartzearen erdian kokatzeko. Emakumeak biktimatzat hartzen direnean, ahalduntze-prozesu bat baitakar, jasandako indarkeria salatzeko eta “etorkizuneko irteeran pentsatuz” kaltea gainditzeko aukera emango diena. Eta “bizirik atera” direnak izango dira, eta “hemen eraldatze-agenteen zeregin soziala izango dute”.

Indarkeria matxistaren biktima diren emakumeen oroimenerako eta memoriarako gune bat sortzeko ekintza hori joan den urteko Udal Aurrekontuaren Proiektuan onartutako zuzenketa bat izan zen.

EMAKUMEEN AURKAKO INDARKERIA-PROZESUA

Horma-irudi honek modu sinbolikoan erakusten du “indarkeria matxistaren zikloa“, emakume biktimek bizi duten prozesua, indarkeria sotilenetik basatieneraino. Ruth Juanek indarkeria matxista lehen pertsonan pairatu dutenen eskutik ezagutu ahal izan ditu fase horiek, Bizitu Elkartea osatzen duten emakume talde baten testigantza pertsonalak izan baititu obra artistiko hau diseinatzeko.

Margolana Mesedeetako kaiako hormaren neurriaren eta harriaren ezaugarrietara egokituko da, eta fase horiek islatuko dituzten hainbat sekuentziaz osatuko da. Horren harira, Nekane Alonsok aurreratu duenez, muralean “biktimek bizi dituzten indarkerien intentsitatea eta maila ezagutzeko aukera izango dugu. Iluntasunik handienean daudenean eta beren bizitzarekin jarraitzeko irtetea lortzen dutenean, berriz jaiotzen dira eta beren burua beren bizitzaren erdigune sentitzen dute“.

Hurrengo hiru asteetan, emakumea protagonista bakarra izango duen horma-irudiaren emaitza ikusiko dugu. “Egiturazko indarkeria hori sortzen jarraitzen duten patriarkatuaren eredu matxistei buruzko kritika eta salaketa da”, azaldu du zinegotziak. Horretarako, emakumeen gorputz biluzietan oinarritzen da artista, eta horren gainean, Ruth Juanek honako hau zehaztu du: “emakumeak, hiru metroko altuera dutenak, biluzik egongo dira, inolako balio erantsirik eman beharrik gabe, hala nola janzkera, eta, horrela, indarkeria matxistak haien gorputzetan duen eragina erakustea, gorputza oinazearen gune den aldetik eta bertan bizi izandako indarkeria-egoeraren ondoriozko gaixotasunak sortzen baitira”; izan ere, adierazi duenez, “hainbat emakumerekin hitz egiteko aukera izan dut eta beren kontakizunak, etengabe, gorputzari, gaixotasunei, tentsioari eta indarkeriek gorputzean dituzten eraginei buruzkoak ziren.”

RUTH JUAN

Ruth Juan Bilboko San Francisco auzoan bizi da duela 12 urtetik. Bere lanak hiria du ardatz, eguneroko bizimodua, gizarte auziak eta lankidetza proiektuak. Bilbao Arte Fundazioak beka bat eman zion 2013, eta han sortu zuen lehen liburu irudiztatua, “Bilbo Zaharra, tolerantzia eremua”. Gaur egun, hainbat proiektutan ari da irudiztatzaile freelance gisa, eta berak sortu du JunitaMakina marka.

Liburuetarako marrazkiak edo irudi grafikozko lanak nahiz horma irudi koloretsuak egiten ditu; horma-irudi horiek Bilbo Zaharreko hainbat gunetan daude kokatuta, hala nola Marzana ostatuan, Gorte kalean, Bailen kalean eta Sortze Garbiaren komentuan. Horma-irudietako esku-hartze hauek Bilboko Udalak sustatuak dira, Bilbo Zaharra, San Frantzisko eta Zabala auzoek eratzen duten hiri-eremua biziberritzeko eta berritzeko estrategiaren barruan.

SARE SOZIALAK:

 

Zerikusia duten edukiak

Irudiak

Bideoak

PDFak

Audioak

Erlazionatutako bidalketak